افتح قلبك مع هبة ياسين.. أنا عارفه أنه متجوز بس بحبه!!

افتح قلبك مع هبة ياسين.. أنا عارفه أنه متجوز بس بحبه!!



الخميس، 12 مايو 2011 - 13:19



[ندعوك للتسجيل في المنتدى أو التعريف بنفسك لمعاينة هذه الصورة]
د. هبة يس







أرسلت (س. ك) إلى افتح قلبك تقول: أنا أرملة عمرى 28 سنة، عارفة
إنى صغيرة، لكن أمر الله أن زوجى توفى فى حادثة عربية، عندى طفلة عمرها
سنتين، شكلى معقول وعائلتى متوسطة، باشتغل فى وظيفة حكومية، يعنى كل ظروفى
تقدرى تقولى عليها متوسطة، لا أنا فوق أوى ولا تحت أوى، اتصدمت بعد موت
زوجى رغم أن زواجنا لم يكن موفق، وكنا على خلاف دائم، لكن بعد مرور حوالى
سنة على وفاته بدأ يظهر زميل لى فى العمل فى الصورة، هو كان موجود فى الشغل
من قبل وفاة زوجى، لكن أنا بدأت أخد بالى منه مؤخرا بس، يعنى عمرى ما فكرت
فيه ولا فى غيره، والله طول ما جوزى كان عايش، بدأت ألاحظ إنه جدع ومحترم
ومحبوب من كل الشغل، كمان وسيم ومستواه المادى مرتفع إلى حد ما، بدون
مقدمات حبيته، وطبعا بأن عليا، وهو خد باله، لكن عشان هو مهذب ماستغلش
الموقف وفتح معايا أى كلام، المشكلة الكبيرة أنه متجوز، وأب لطفلين، لكن
أنا حاسه إنه غير سعيد فى حياته، لأنه كتير بييجى الشغل متضايق، وساعات
كتير بيطلب غدا فى الشغل، وبيروح متاخر حتى لو الشغل خلص، بفكر فيه على
طول، وأصبح هو الأمل اللى أنا عايشه بيه، لكن ضميرى مش عايز يسيبنى فى
حالى، وأرجع أفكر بالعقل وأقول ما هو واحدة أرملة ومعاها طفلة زيى مين ممكن
يرتبط بيها غير واحد أرمل أو مطلق أو متجوز، يبقى فين المشكلة؟، وبعدين ما
هو الجواز مرتين وتلاتة وأربعة حلال، يعنى أنا مش هاعمل حاجة حرام، بافكر
أكلمه واصرح له بحبى كل يوم ألف مرة، لكن خايفة آخد خطوة فى طريق مش عارفه
نهايته.. ممكن تساعدينى يا دكتوره؟.

وإلى (س) أقول:
الحمد لله إنك ماخدتيش أى خطوة حتى الآن يا (س)، لأنه فعلا الطريق ده محفوف
بالمخاطر، وأنت محتاجه تعرفى إنت داخله على إيه، ومش تغمضى عينيكى وترمى
نفسك فى البحر وخلاص، هاكلمك من جهتين، الجهة اللى تخصك، والجهة إلى تخص
زوجة الشخص ده، أولا من جهتك أنت:

1) هل أنت متأكدة أنك بتحبيه لشخصه ولا لأنه أنسب واحد لظروفك فى محيطك؟،
أعتقد أنك تعلقتى بيه لأنك رأيتى أنه مناسب لك كأرملة وليس كشخصية وإنسانه،
بدليل إنك زى مابتقولى لم تفكرى فيه أو لفت انتباهك إلا بعد وفاة زوجك،
وبالتالى يبقى مش هو ده بالذات اللى تربطى سعادتك بيه وإلا فلا، لازم
تتأكدى إنه مش بس ظروفك وقلة الفرص أمامك هى اللى دفعتك للتفكير فيه.

2) فرضنا إنك بتحبيه لشخصه فعلا، فكرتى هو هايكون رد فعله إيه؟، زى ما
بتقولى هو حاسس بيكى، وبدأ يفهم، ونعمه من ربنا إنه بنى آدم محترم وماحاولش
يلعب معاكى اللعبة إياها، لكن مافكرتيش هو ليه ماخدش أى خطوة ناحيتك؟، بما
أنه محترم يبقى إذا هو ماقربش ناحيتك عشان مش شايف أن فى سكه محترمة
تقربكم لبعض، أو أن السكة المحترمة (اللى هى الزواج الثانى) غير مقبولة أو
غير متاحة بالنسبة له، يبقى إذا خدى بالك إنه مفيش طريق (حلال) لهذه
العلاقة واضح فى الأفق.

3) برضه هانفرض إنه بعد ما صارحتيه تجاوب معاكى، وحب يطور الموقف اللى
زواج، هل أنت على دراية بحجم المشاكل اللى هاتدخلى فيها لما تكونى زوجه
تانية؟، هل أنتى على استعداد لدخول (معركة) غير منتهية مع زوجته الأولى؟،
وهل عندك قدره على تحمل الضغط العصبى اللى أنت وهو هاتكونوا فيه بعد كده؟،
وهل مع كل ده هاتفضلى تحبيه وتنظرى إليه مثل نظرتك له الآن؟، بمنتهى الأمان
ماعتقدش، لكن أنت أدرى واحده بنفسك، فكرى وشوفى أنت ردك إيه؟.

أما من الجهة الأخرى:
1) فعلا الزواج مرتين وتلاتة وأربعة حلال، وأنت مش هاتعملى حاجة عيب أو
حرام، لكن ياترى ده كان هايبقى رأيك لو كان جوزك هو اللى اتجوز عليكي؟، حطى
نفسك مكان زوجته وقدرى إحساسها بأن فى واحدة تانية جات فجأة كده وقالت لك
(معلش هاخد منك جوزك شوية)، كنتى هاتحسى بإيه؟ وكنتى هاتتصرفى إزاى؟ وكنتى
هاتحسى بظلم أد إيه؟.

2) عرفتى منين إنه غير سعيد فى حياته؟، لمجرد إنه بيتضايق وبيتغدى ساعات فى
الشغل وبيروح متأخر؟، دى ممكن تكون دلائل فعلا، لكن لا هو ولا غيره أكد لك
أن زواجه غير موفق، يبقى بأى حق تعطى لنفسك الفرصة إنك تخربى هذا الزواج
لمجرد تصورك أنه غير سعيد.

3) فكرى فى أولاده، هل من العدل إنك تاخديه منهم (ده لو حتى فرضنا إن زوجته
غير سعيدة معاه ومش عايزاه)، هل هاتسمحى له إنه يودهم ويراعيهم لو ارتبطى
بيه؟ ولا هاتعملى زى أى زوجة أب تقليديه وهاتمنعيه عنهم شيئا فشيئا لغاية
ما يفقدوا الأمل فيه ويبقى بتاعك لوحدك؟.

خلاصة الموضوع يا (س) إنه صحيح أنت أرملة وعندك ظروف، لكن ده مش معناه إنك
تحطى نفسك فى الموقف ده، ممكن ترتبطى بأرمل أو مطلق ودول ظروفهم مختلفة
تماما عن واحد متجوز، ثم إنك لسه صغيرة فعلا، يعنى ممكن جدا ترتبطى بإنسان
بيحبك بجد وممكن مايكونش مرتبط أصلا، يعنى هايبقى معاكى وليكى أنت لوحدك.

وحتى لو ده ماحصلش يا (س) عايزه أخاطب ضميرك الجميل ده اللى مش عايز ينام
وأقول له، بذمتك هاتكون مرتاح لو بنيت سعادتك على شقاء ناس تانيين؟.

لو تقدرى حاولى تنقلى شغلك مكان تانى أو إدارة تانية، أو حتى تتجنبى رؤيته
أثناء العمل قدر المستطاع، يا ريت تعملى ده، لكن الأهم من كل ده إنك تغيرى
تفكيرك فيه ونظرتك ليه، وأنا عندى إحساس قوى إنك هاتقدرى لأنك انتى حبتيه
بقرار منك إنتى وبعد ما فكرتى ولقيتيه ينفع، فلما هاتفكرى وتتأكدى إنه مش
نافع، هايبعد عن دماغك شوية شوية.

¯`'•.¸(¯`'•.¸, _________((((عبدوصفايا ))))________ , .•'´¯) .•'´¯)
(¯`'•.¸(¯`'•.¸««««««««««««»»»»»»»»»»»¸.•'´¯).•'´¯)
--==>>>---> مشكوررررر ويسلمووووووووو