الضمير .... السلبية .... الجهل .... الشهامة

طبعا معروف ان السلبية بقت على قفا مين يشيل الضمير انعدم والشهامة ماتت انا هاعرض اللى عايز اقوله فى صورة مواقف وهاحكيلكم كام حوار صغير بس يبين حجات كتير من اللى انا بقول عليها

اولاً حوار والدتى سمعته فى الميكروباص وحكتهولى من فترة مش عارف اقول عليه لذيذ ولا مضحك ولا انا لله وانا اليه راجعون ولا لا حول ولا قوة إلا بالله هاسيبكم انتم تحكموا بس الصراحة انا رد فعلى انى ضحكت وجامد جدا وضربت ايد على ايد وقلت يا حول الله يارب

الاول: عملت ايه مع بتاع الموبايلات

التانى: مفيش ضربناه وكسرناله المحل الجزاز والرفوف وخلينا عليها واطيها

الاول: ومخدتلكش ليه موبايلين ولا حاجة من المحل بالمره انا لو مكانك كنت عملت كده

التانى : لا حرام انت بتتكلم ازاى؟

لا بصوا اللى جايه ديه كمان التانى رجع وقاله وايه كمان ده انا كسرت جزاز عربيتى قلى ليه بقى قلتيلى ليه اقلك بقى ياسيدى عملت كده علشان البوليس ميشكش فيا

شوفتوا االتحضر و الضمير وعدم الجهل والذكاء

ثانيا فى بقى عملية حسابية بسيطة بس انا الصراحه مش فاهمها ياريت حد يساعدنى فيها
دلوقت احنا 75 مليون اللى المفروض يروح علشان استفتاء التعديلات الدستورية واللى معاهم بطايق انتخابية 35 مليون راح من الـ 35 دول 5 مليون ناخب طيب 75% من الـ 5 مليون دول قالوا نعم يعنى بتاع 3مليون اتكتب تانى يوم ان 75% من الشعب قال نعم للاستفتاءات الدستورية هو النسبة بتتحسب من الـ 5 مليون ولا من الـ 75 مليون
شوفتوا برده الـسلبية
طبعا عندهم حق انهم يحسبوا الـ 3 مليون دول 75% من الشعب لان هما اللى معاهم بطايق انتخابية اذن دول هما اللى بيمثلوا الشعب طبعا ده من وجهة نظرهم لكن انا شايف ان النسبة تحت المعدل اذن لازم تتلغى طالما باقى الشعب ( الـ 30 مليون) امتنعوا عن التصويت

ثالثا الشهامة بقى هى الحكاية طويلة شوية بس معلش استحملونى اصل انا بقى اتسرق منى الموبايل امبارح بطريقة ظريفة جدا اللى حصل ان واحد خبت فى العربية من ورا معاه موتوسيكل وانا بلف شمال فانا بصتله وسكت ابنه يقلى مش تفتح وبزعيق قلتله وانت مش شايف الاشارة الشمال المهم والدى نزله طبعا والدى بيكلمه اخد ضربه من الراجل رجعته مترين لورا وكان ممكن اى عربية ماشية تخبطه كمان طبعا انا شوفت المنظر خرجت عن شعورى بقى ولكوا ان تتخيلوا اللى حصل الناس بقى اللى واقفه عملوا ايه هو كان الراجل وابنه واحنا ضربناهم لقيتلك الناس بتضرب معاهم ويضربوا ويقولوى احترم نفسك ده اد والدك طب وابويا اللى كان هيموت ده يعنى انا واخد تلت ضربات على راسى من الناس مش من الراجل او ابنه والضرب من ضهرى طيب كنتوا فين لما من كام يوم تباع ميكروباص ضرب برده واحد اد والده وراجل كبير فى السن علشان الآجرة انتوا فين كل يوم وبتوع الميكروباصات ادامكم كل يوم بتبلطج على الناس الكبيرة والعيال الصغير وبيضربوهم وبيركبوهم بالعافية علشان مايركبوش مع سواق تانى طيب اهم فى الآخره طلعوا حرامية وطلعت حركة لانى طبعا لما رجعت للعربية ملقتش الموبايل ومتشكرين جدا يا ولاد البلد انكم ساعدتوهم

وطبعا كل حاجة غلط بتحصل حوالينا هنا فبسبب الجهل الدول اللى اتقدمت اتقدمت علشان فى علم وتكنولوجيا وعلشان فى ناس تخترع فى المجالات ديه مش اتقدموا بالكورة والرقص والغنا وطبعا الحكومة هى اللى بتسوق الناس للمجال ده وفى قوى خارجية هى اللى بتسوق الحكومة فى التيار ده برده ماهو لما الواحد يطلع يلاقى بتاع الكورة والراقصين معاهم فلوس اد كده والكيميائى ولا الدكتور ولا الصيدلى بيطلع عين اهله علشان يعيش بس عيشة كويسة يبقى تفكيرة يروح فين فى الكورة والرقص وبالتالى مايتعلمش لا علم ولا كورة لانه اهله معهمش فلوس يدخلوه نادى حتى كل اللى بيتعلموا هو الرقص فى الافراح الشعبية لكن فى البلاد التانية زى ما بتاع الكورة عايش بتاع العلم برده عايش وزى مابيصرفوا على الرياضة والفن بيصرفوا برده على العلم والتكنولوجيا فبالتالى لما البنى آدم بيكبر بيختار اللى هو عايزة واللى مخه رايح فيه من غير مايشيل هم الفلوس